Propagando praepositi in generalibus comitiis habitis diebus 17, 24, 27, et 31 mensis Augusti, nec non die 5 Septembris anni 1885, diligenti inquisitione adhibita, atque omnibus accurato studio debitaque judicii maturitate pensatis, Decreta ejusdem Concilii expenderunt et, nonullis emendationibus ac modificationibus adjectis, eadem ut ab omnibus ad quos spectat inviolabiliter observentur recognoverunt. Hanc autem S. Congregationis sententiam Summo Pontifici Leoni XIII. a R. P. D. Dominico Iacobini ejusdem S. Congregationis Secretario in Audientia diei 10 Septembris 1885 relatam, Sanctitas Sua benigne approbare dignata est, et super his praesens Decretum expediri mandavit. Datum Romae ex Aedibus Sacrae Congregationis de Propaganda Fide, die 21 Septembris, Anno 1885. D. ARCHIEP. TYREN. Secret. IOANNES CARD. SIMEONI Praefectus. ACTA CONCILII. LITERAE APOSTOLICAE. Venerabili Fratri Jacobo Gibbons, Archiepiscopo Baltimorensi LEO PP. XIII. VENERABILIS FRATER, SALUTEM ET APOSTOLICAM BENEDICTIONEM. Rei Catholicae incrementum, Ecclesiarum utilitatem et fidelium commoda ex debito Apostolicae servitutis Nostrae qua patet orbis intendentes, de Venerabilium Fratrum Nostrorum S. R. E. Cardinalium negotiis propagandae fidei praepositorum consilio, auditisque Venerabilibus Fratribus Foederatarum Septentrionalis Americae Ditionum Episcopis, Plenarium Concilium, mense Novembri, hoc vertente anno, Baltimorae per eosdem Sacrorum Antistites habendum decrevimus, ut iidem Episcopi, collatis consiliis, quae ad evellendos, funditusque tollendos, si qui irrepserint, abusus, ad ecclesiasticam disciplinam confirmandam, ad Dioecesium statum ita ordinandum, ut propius ad commune Ecclesiae jus, quantum fieri possit, accedat, et ad Catholicam religionem latius propagandam provehendamque opportuna in Domino judicaverint, proponant. Jam vero, quum Venerabilis Frater Noster Joannes S. R. E. Presbyter Cardinalis McCloskey, ex dispensatione Apostolica, Archiepiscopus Neo-Eboracensis, adversa detineatur valetudine, Tibi, Venerabilis Frater, cujus eximia pietas, doctrinae ac prudentiae laus, singularisque erga Sanctam Sedem Apostolicam fides et observantia perspecta Nobis est et explorata, praefatum indicendi convocandique Concilium, eique praesidendi munus, Apostolica Auctoritate Nostra, harum Litterarum vi, delegamus. Volumus vero ac praecipimus, ut hujusce Concilii acta omnia et decreta ad Sanctam Sedem Apostolicam, pro eorumdem revisione et recognitione quam primum mittantur. Haec decernimus et jubemus, non obstantibus, licet speciali atque individua mentione ac derogatione dignis, in contrarium facientibus quibuscumque. Datum Romae apud S. Petrum sub Annulo Piscatoris, die IV Pontificatus Nostri Anno Sexto. Januarii MDCCCLXXXIV. TH. CARD. MERTEL. DEI ET APOSTOLICAE SEDIS GRATIA, ARCHIEPISCOPUS BALTIMORENSIS ET DELEGATUS APOSTOLICUS, Illustrissimis ac Reverendissimis Archiepiscopis, Episcopis et Vicariis Apostolicis, in Foederatis Septentrionalis Americae Statibus, necnon Reverendissimis Abbatibus atque Admodum Reverendis Religiosorum Ordinum aut Congregationum Praepositis, caeterisque omnibus qui de jure vel consuetudine Conciliis Provincialibus vel Plenariis adesse debent: Salutem in Domino. Decem et octo abhinc annis, divinae miserationis aspirante gratia, Concilium Plenarium Baltimorense Secundum celebratum fuit; et nemo ignorat quot ex illo bona provenerint pro salute ac perfectione fidelium in his regionibus degentium, quot emolumenta pietatis ad |