IN PSALTERIUM.

QUIDQUID in ceteris Scripturæ libris utile est, unus Psalmorun liber complectitur. Psalmus tranquillitas est animarum: pacis arbiter, tumultuosas turbulentasque cogitationes compescit..... Dæmones Psalmus fugat, accersit Angelorum patrocinium, ministrat arma contra nocturnos timores; diurnorum laborum est requies, infantium securitas, ornamentum juvenum, senum consolatio, convenientissimum mulierum decus..... Psalmus incipientibus initium est, incrementum proficientibus, perfectis firmamentum... Psalmus Angelorum opus est, cœlestis conversatio, spirituale thymiama........... Quid inde discere non queas? Nonne fortitudinis claritudinem? nonne justitiæ integritatem, gravitatem temperantiæ, prudentiæ perfectionem? Nonne pœnitentiæ modum, aut patientiæ mensuram? nonne tandem omnia quæcumque proferri possunt bona? Hic perfecta theologia, hic de Christi in carnem adventu vaticinium; hic comminatio judicii, resurrectionis spes, timor supplicii, gloriæ promissiones, mysteriorum revelatio: omnia in Psalmorum libro, velut in magno et communi promptuario, reconduntur. S. BASIL. Homil. in Ps. 1.

QUID Psalmo gratius? Psalmus benedictio populi est, Dei laus, plebis laudatio, plausus omnium, sermo universorum, vox Ecclesiæ, fidei canora confessio, auctoritatis plena devotio, libertatis lætitia, clamor jucunditatis, lætitiæ resultatic. Ab iracundia mitigat, à sollicitudine abdicat, à moerore allevat..... Diei ortus Psalmum resultat, Psalmum resonat occasus..... Psalmus cantatur ab Imperatoribus, jubilatur à populis. Certant clamare singuli quod omnibus proficit. Domi Psalmus canitur, forìs recensetur. Sine labore percipitur, cum voluptate servatur. Psalmus dissidentes copulat, discordes sociat, offensos reconciliat. Magnum planè unitatis vinculum, in unum chorum totius nume

rum plebis coire..... Certat in Psalmo doctrina cum gratia simul· Cantatur ad delectationem, discitur ad eruditionem. S. AMBROS. Præf. in Ps. 1.

MULTA membra, sub uno capite ipso Salvatore nostro, caritatis et pacis vinculo colligata, unus homo sunt : et ipsorum, ut unius hominis, vox in Psalmis auditur..... Homo ille ubique diffusus est, cujus caput sursum est, membra deorsum. Ejus vocem in omnibus Psalmis, vel psallentem vel gementem, vel lætantem in spe, vel suspirantem in re, notissimam et familiarissimam habere debemus tanquam nostram. S. Auc. in Ps. LXIX et XLII.