Academiae vale dicturo nihil mihi restat iucundius quam ut grati animi sensum significem erga viros praestantissimos, qui Praeceptores mihi contigerunt; inprimis erga Te, Pater Carissime, qui me puerum latinae linguae et graecae elementis ita imbuisti, ut per totam vitam institutionis Tuae fructus percepturus sim. Nunc igitur palam gratias quam maximas Tibi offero pro egregia illa institutione, quam satis laudare

nequeo.

Permultum Tibi me debere, Clarissime VAN HERWERDEN, Promotor Aestumatissime, lubens profiteor. Publicis privatisque lectionibus studia mea fovisti, rectis consiliis me adiuvisti et ubique benevolentiam Tuam in me praestitisti. Persuasum Tibi habeto me haec semper grato animo recordaturum.

Vobis, Viri Clarissimi OPZOOMER, WIJNNE, FRANCKEN, maxima et perpetua gratia a me habebitur. Nunquam non gaudebo me lectiones Vestras frequentavisse, unde uberrimos fructus et tunc cum intereram percepi et nunc percipio. Quid vobis debeam, Viri Praestantissimi, nunquam obliviscar, dum spiritus hos regit

VIII

Neque Tu silentio mihi praetereundus es, Vir Clarissime BRILL, nunc rude donatus, olim studiosae iuventuti in republica litterarum strenuus antecessor. Diu valeas diuque otio fruaris, quo nemo Tibi invidet. Vobis omnibus, Viri Clarissimi, longa et felix vita concedatur in Academiae et Patriae decus.

Vos quoque, amici commilitones, in quorum numero quatuor fratres habui, valete. Teneat nos semper illud vinculum amicitiae, quod adhuc nos tenuit.

DE UNIVERSA SCHOLIORUM

INDOLE.

Scholia in Platonem, quae hodie circumferuntur 1), ab auctoribus suis ex variis fontibus petita sunt. Namque alia debentur philosophorum commentariis, alia ex lexicis grammaticorum descripta sunt, alia aliunde corrasa. De tertio hoc genere Scholiorum atque de primo paucis absolvam, de secundo, i. e. de iis, quae e lexicis grammaticorum desumta sunt, pluribus acturus; in quibus huius disputationis argumentum positum erit.

Philosophi, e quorum scriptis Scholiastae hauserunt, Neoplatonici sunt, qui in singulos Platonis libros commentarios conficiebant. In Scholiis saepe nominatim laudantur e. c. Plotinus Schol. Gorg. 507 D Rep. VI: 498 B, Iamblichus Schol. Sophist. 216 A. Rep. VI: 509 D. Proclus Schol. Theaet. 155 B Rep. III: 398 A Tim. 17 A 24 A 25 A et C, Olympiodorus Schol. Phaedr. 227 A; saepius etiam eorum scripta expilantur auctoris nomine omisso e. c. Olympiodori commentarius in Phaedonem, Procli in Theaetetum, Hermiae in Phaedrum, Procli et Olympiodori in Alcibiadem priorem, Olympiodori in Gorgiam, Procli in Timaeum. Praeterea verisimiliter Procli commentario in Leges usum esse Scholiastam in Scholiis ad hos libros Th. Mettaueri diligentia docuit in Dissertatione Inaugurali Philologica de Platonis Scholiorum fontibus, Turici 1880, ad quem librum eos relegatos volo, qui plura de hoc argumento cognoscere cupiunt.

De iis, quae undecunque corrasa sunt, haec observasse sufficiat. Ex historicis laudatos invenimus Hellanicum Schol. Sympos. 208 D (cf. Müller, fr. histor. gr. I. 47. 10. Proleg. pg. xxv1) et Manethonem Schol. Tim. 21 Ε (ἐκ τῶν Μανεθὼ Αἰγυπτιακῶν); tum auctoris nomine omisso Phlegontis Tralliani Ὀλυμπιάδας ἢ χρονικά Schol. Rep. V: 465 D (cf. Müller 1.1. III. 603) aliosque quos ignoramus (cf. Schol. Rep. V: 453 D VIII: 566 A et C). Glossae geographicae desumtae