No. 422. Arab.

DE SEQUENTIBUS BENEDICTIONIBUS

MONITU M.

Liturgiis Copticis istas benedictiones adjicere operae pretium visum est, cum ad eas quodammodo pertineant, et argumenta perspicua suppeditent fidei Coptitarum circa Eucharistiae sacramentum. Illas descripsimus ex Rituali Gabrielis Alexandrini Patriarchae, cujus libri praecipua est apud eos autoritas. Cum vero historia Patriarchalis ad illius usque tempora non perveniat, scimus tantum ex inscriptione Codicis qui servatur in Bibliotheca Regia, Gabrielem 88um. numerari in ordine Patriarcharum Coptitarum Alexandrinorum, et Ritualem librum ordinatum et ejus autoritate confirmatum fuisse anno Martyrum 1127. qui est J. C. 1411. non 427. ut mendose editum est in Historia Alexandrina. Easdem benedictiones quibusdam exceptis ediderat anno 1653. Leo Allatius in Symmictis, ex versione Athanasii Kircheri, vel cujusdam potius advenae Orien– talis qui sententiam autoris saepe non assecutus est, nec videtur codicem habuisse satis integrum. Itaque novam versionem dare visum est ad Regium exemplar factam. In altero quem Kircherus secutus est, extabat subscriptio, qua notatur prodiisse Ritualem librum tempore Gabrielis nonagesimi quinti Patriarchae. Sed deceptus est libri descriptor, aut interpres, si quid aliud significare voluit, nisi quod codex scriptus fuisset tempore istius Patriarchae, qui Gabriel etiam dictus est; et Mischanensis ad alterius differentiam vocatur a Wanslebio, et ab autoribus Historiae Patriarchalis Bollandianae: inter quem et Gabrielem Ritualis reformatorem et promulgatorem, sex alii numerantur. Nemo autem, nisi in Orientalis Ecclesiae historia plane hospes, offendetur istis orationibus, quasi novitatem redoleant, cum vasorum sucrorum veneratio antiquissima sit in universa Ecclesia, quam religionem Orientales retinuerunt. Hinc miracula multa narrant de Eucharistia in illis facta, et illud praesertim in vita Jacobi Patriarchae L. de calice ex quo, cum Hist. Patr. Alex. jussu Muhamedani Praefecti qui Ecclesiam vasis spoliaverat, ab aurifice frangi coepisset, magna fluxit sanguinis copia. Quae ad easdem benedictiones illustrandas pertinent in Notis dicentur.

p. 270.

ORATIONES ET BENEDICTIONES

AD CONSECRATIONEM OMNIUM

ALTARIS INSTRUMENTORUM.

Dicet Episcopus.

Deus bone, sancte, in sanctis requiescens, cujus benignitate et praeceptis accepit Moyses de sanguine, et aspersit super omnia instrumenta ministerii, petimus coram te prostrati, o amator hominum bone, ut digneris sanctificare haec instrumenta per Spiritum sanctum tuum et aspersionem sanguinis Christi tui, ut sint pura, et vasa ministerii sancti et veri, sacramentorum vitam conferentium, quae sunt corpus et sanguis pretiosus Christi tui, quia sanctum est nomen tuum et gloria plenum omni tempore, Pater, Fili, et Spiritus sancte nunc et semper, etc.

Signat ca, tum dicit. Benedictus Dominus Jesus Christus Filius Dei sancti, et Spiritus sanctus. Amen.

Oratio consecrationis Disci et Velorum ejus.
Dicet Episcopus.

Dominator Dominus Deus, Dominus bonus, extendat brachia sua sancta, et sanctificet discum plenum bonis, quae praeparavit diligentibus nomen suum sanctum, recumbentibus in convivio annorum mille. Et nunc, Domine, amator hominum, extende manum tuam divinam super discum hunc benedictum, quem impleturi sunt partibus sive reliquiis corporis tui sancti, quod offerent super altare Sanctuarii sanctae civitatis N. Gloria tibi cum Patre tuo bono, et Spiritu sancto, nunc et semper.

Benedictus

Accipiet Chrisma et discum signabit, dicetque.
Dominus Jesus Christus Filius Dei, et Spiritus sanctus. Amen.

Oratio pro Calice et Mappulis ejus.
Dicet Episcopus.

Dominator Domine Jesu Christe, verax, absque vitio, Deus simul et homo, cujus divinitas divisa non est ab ipsius humanitate,

qui sanguinem proprium effudisti tua voluntate pro creatura tua, impone manum tuam divinam super hunc calicem, sanctifica et purifica eum, ut feratur in eo sanguis ille pretiosus, et sit remedium et remissio iis omnibus qui ex eo vere bibent. Gloria tibi cum Patre tuo bono, et Spiritu sancto nunc et semper.

Accipiet Chrisma quo unget illum intus et foris, et dicet. Sanctitas, puritas, benedictio, et protectio iis omnibus qui bibent ex sanguine tuo, vero, et pretioso. Amen.

Oratio pro Cochleari.

Dicet Episcopus.

Deus qui servum tuum Isaïam dignum fecisti videndi Cherubim in cujus manu forceps erat, quo accepit carbonem ex altari et in os ejus illud injecit: nunc etiam Deus, Pater omnipotens, extende manum tuam super hoc cochlear, in quo suscipienda sunt membra corporis sancti, quod est corpus Filii tui unigeniti Domini, Dei, et Salvatoris nostri Jesu Christi. Benedic illud, sanctifica illud, da illi virtutem et gloriam forcipis, qui est in dextra Cherubim, quia tibi est potestas, gloria, et honor, cum Filio tuo unigenito Jesu Christo, Domino nostro, et Spiritu sancto, nunc et semper.

Signabit illud et dicet. Fortitudo, gloria, honor, et sanctificatio Trinitati sanctae, in Ecclesia una sancta civitatis N.

Oratio pro Mappa nigra quae est super altare.
Dicet Episcopus.

Dominator, Domine, Jesu Christe, princeps lucis, miserator, qui bona largiris sperantibus in te, qui coelos extendisti cum subtilitate, variosque colores in coelo et nubibus impressisti, quamvis re ipsa diversitas non sit. Nunc igitur, Domine, amator hominum, sit potentia tua divina in his instrumentis, mappis scilicet quibus involvuntur membra, seu reliquiae corporis tui sancti, ut mittas super eas virtutem linteorum quae involvebant corpus tuum sanctum, in sepulcro, et supercoelestibus sint similes. Quia tibi est potestas, et honor, etc.

Signabit eam myro, et dicet. Unus Pater sanctus, unus Filius sanctus, unus Spiritus sanctus, ipsi fortitudo, gloria, et potestas Dei. Amen.

Consecratio tabulae ut altare fiat.

Episcopus dicet facie ad Orientem conversa.

Dominator, Domine, Deus omnipotens, qui creasti coelum et terram verbo et imperio tuo et eam replevisti Spiritu sancto tuo, creastique Angelos et Archangelos, Cherubim et Seraphim et omnem exercitum coelestem, maria et flumina et omnia quae in eis sunt. Petimus rogamusque a bonitate tua, o amator hominum, exaudi nos, extende manum tuam invisibilem, et benedic huic tabulae ligneae, ut fiat altare sanctum et mensa sancta, pro altari excelso et e lapide constructo. Tu jussisti servo tuo Moysi, ut sanctificaret tabernaculum sanctum, et omnia quae in eo erant: et ipse benedixit illis, juxta mandatum tuum ad se. Et ego servus tuus coram te consistens, rogo te, ut exaudias me vilem, pauperem, et indignum qui te rogem, o amator hominum bone, propter Jesum Christum Dominum nostrum, et Spiritum sanctum: benedic isti mensae, ut in ea sanctificetur quidquid super ipsam positum fuerit, et omnia altaris instrumenta per gratiam et misericordiam etc.

Tunc accipiet Chrisma sanctum et ex eo signabit tabulam in modum Crucis in quatuor ipsius lateribus dicens. Benedictus Dominus, Jesus Christus, Filius Dei sancti, et Spiritus sanctus, unicus et vivificus. Amen.

Oratio singularis pro altari, cum manibus haereticorum attrectatum fuerit cujuscumque generis, aut muris vel alterius animalis stercore fuerit inquinatum. Primum aqua abluetur, tum recitabuntur preces, adolebitque Episcopus incensum et dicet hanc orationem.

Dominator omnium, quae sunt in rerum natura, omnium existentium institutor, conditorque omnium creaturarum, benedictionibus omnes homines cumulans omni tempore, propter Salvatorem nostrum, et bona tribuens humano generi: qui fundasti terram super stabilitatem suam, qui facis mirabilia solus. Tu Domine in omni loco et in omni civitate et in omni regione dedisti eis Ecclesias, et constituisti in illis altare et praecepisti ut offerrentur nomini tuo sancto oblationes spirituales et sacrificia incruenta, ad salutem animarum hu

manarum.

Dicet Diaconus. Orate.

Tomus 1.

23

Dicet Episcopus facie ad Orientem conversa.

Tu nunc, Domine, per amorem tuum erga homines, mitte Spiritum sanctum tuum et purifica hoc altare ab omni perversa fide haereticorum, ab omnibus immunditiis corporeis, et omnibus actibus foedis et immundis, ut sit spes et salus fidei, iis qui accedent ad divinitatem tuam, renovatio animae corporis et spiritus, et remissio peccatorum, quia tu solus miserator et misericors es, longanimis et multae misericordiae et tibi debetur omnis gloria Patri, Filio et Spiritui sancto, nunc et semper et in saecula saeculorum. Amen.

Et quinquies mensam et ejus quatuor latera Cruce signabit.

Finis benedictionum juxta Rituale Anba Gabrielis
Patriarchae Alexandrini.