CAROLUS-LUDOVICUS DE SALMON DU CHATELLIER, DEI MISERATIONE, ET S. SEDIS APOSTOLICÆ GRATIA, EPISCOPUS EBROICENSIS, COMES ET PAR FRANCIÆ, CLERO EBROICENSI SALUTEM ET BENEDICTIONEM IN CHRISTO JESU. PASCENDO gregi nostro vix admotis, dilectissimi Fratres, pro nostrâ in Deum quantulâcumque pietate, ecclesiarum dioecesis nostræ sollicitudine et amantissimâ in vos effusâ dilectione, sacræ liturgia rimas obducere, discrepantiam tollere, nitorem promovere onus nobis fuit et animus. Penitus effluxerat vetus editio, nobiles nec ingratæ ex priscis Rothomagensi et Lexoviensi ecclesiis decisæ regiones apostolicâ dispositione huic Ebroicensi accreverant, undequaque illata varietas, et unitas exoptata. Providæ summi Dei benignitati confidentes, disparem cultûs nostri rationem non antè ad Ecclesiæ matris usum revocare proposuimus quàm minoribus impensis majorique facilitate id fieri daretur. Cùm verò in dies magis urgeat librorum maxime choralium et Breviarii defectus, conceptam mentem ad effectum transire necesse fuit. Edito Processionali, Breviario imprimis manum admovimus, ut ad illius emendationem, cæteroquin levissimam, faciliùs cætera componerentur. Quarum quidem mutationum rationem sicut et in promptu est, ità et breviter significabimus. Annualis minoris titulum in Parisiensi diœcesi iis solemnibus adscriptam qui annualium privilegiis gaudent et octavam secundæ classis habent, ad tollendam omnem in rubricis ambiguitatem, admisimus. S. Matthiæ festum eo quo cadit die, etiam in Quadragesimâ celebrandum esse satiùs visum est, unde feriæ quadragesimales quæ, ex Rubricis, omni officio nisi apud populum festivato prævalebant, duplici majori qualicumque in futurum cedent. Ecclesiæ romanæ, cui concordare operæ pretium est, vestigiis adhærentes suis diebus quædam festa restituimus, S. Joseph decimo nono Martii, SS. Joachim et Annæ vigesimo sexto Julii, S. Matthæus vigesimo primo Septembris, SS. Angelorum custodum secundo Octobris, et S. Francisci Xaverii tertio Decembris. Dilatatis etiam diœcesis nostræ finibus, patere debuit finitimis li E a. |