Als Ich solchen tag fortt zu Reytten Morgens früe an die hand genomen vnd den getrewen Gott zu meiner vorhabende Weytte Ray vmb glückhlichen beystand ersuchtt, bin Ich In einem Ritt zu Ailf Uhre vmb Mittag gehn leypheim khomen, daß Mittagmal mit meinem freindtlichen lieben Vöttern, hans Cristoff Krafften, Ulmischen Vogt daselbst, eingenommen, haben wir vns gantz frölich mit einander gelötztt, also daß Ich Am Abendtt spatt Ulm erraycht.

Volgendten Suntag vmb ein Uhr Nachmittag Ritt Ich mitt einem Mötzger, Davidt Glaser genandtt, selbs ander vf pfullendorf zue, der mich bis gehn Schafhausen beritten gemacht. Ob wol Ich mit trawrigem Hertzen, wie gutt zuerachtten, von meinem lieben Vatter (als der noch In hoffnung gestanden, dise ferne Rayß mir Außzuröden) vnd geschwistergitt mein freindtlich vrlaub genommen, haben mich die Nasse augen, so es aller seytts gegeben, nitt vil geIrtt, Sundern bin mit Leychttsinnigem gemüett In Namen Gottes forttgeritten: In wölchem forttreytten hab Ich mich Noch einmal vor vnser frawen thor vmb vnd mitt Verwunderung meinen fromen Vattern Am fenster gesehen, da mir bewußt gewesen, daß er wegen seiner krankhaytt des podagra In vil tagen nitt aus dem böth khomen: Wölches gesichtt mir mer Zu hertzen gangen, als da Ich von Ime mein kündtliche Urlaub genommen. Vnd da Ich auff ein Viertel Meil an die Iller khomen, Wölcher Fluß nitt fern In den Thonnau strom flüßt, fragtt mich mein glayttsman der Mötzger, er habe gehörtt, Ich Wölle In die Türckey verraysen, ob es war sey. Als Ich Ime Anzaigtte, Ich hoffe, ehe drey oder Vier Monatt Außgehn, Ich wölle mit Gotteshülff zuo Jerusalem oder nitt Weytt davon sein, darlber gibtt er mir dise gutthertzige Anttwortt, was mich für ein Nott zu solcher weytten Reyß thüe treyben, ob Ich mich daselbsten Wöll verheurathen.

Es haben meine herrn Manlichischen mir Auch mitt Zufüeren eingehendigtt ein schön vergultt Dreyspännig Birstrohr, samptt Zwo schöne schlagendte Vhren, so bey Achtzig Gulden haben Cost, Allein Darumb, damitt Ich mit den Jenigen Obersten oder Gouernatores vf den Nottfall durch ein oder daß Ander present dösto leichtter khinde In gutte khundtschafft vnd derselben gutte huld gerathen.

Den 19. May kamen wir vf den Mittag gehn Schafhausen, vnd ob wol alda wegen bemeltts Birstrors, so mir der Mötzger am füeren geschödigett, durch daß widerumb Zurichtten Ich mich noch ettlich stund mußte Aufhaltten, So hab Ich doch den Mötzger wider Zurückh nach Ulm abgeförttigt vnd bin vff einem Andern klöpper noch denselben Abendt gehn Kayserstuel khomen.

Den 20. Morgens früe machtt Ich mich Widerumb Auf vnd kam vmb Achtt Uhrn Vormittag gehn Baden In Schweitz In mainung alda die post Zunemen; khundte Aber deren pferdt keins biß erst gögen Abendtt vmb fünf Uhrn bekhomen, Vrsach das dieselbige Alle sind gehn Zurcach vff denselbigen Jarmarcktt Außgelihen worden.

Demnach mir Aber die weil woltte Zu Lang werden, hab Ich gleich meinen geförtten, so zu fueß gangen vnd das Roß gehn kayẞerstuel woltte Zu Rückh Reytten, bey mir behaltten, vnd gebetten, er soltte mich hinab Ins Bad fürren (weil es so Weytt bekanntt, möcht Ichs auch wol sehen). Als wir vmb Zöhen Vhre gehn Mittag gessen vnd hernach zum Bad hinab khomen, hatt es mir so wol gefallen, dass Ich mir vmb ein gemach getrachtt, mein vnd meines mittgeförtten klayder dar Innen Zuverwaren, vnd weil Niemandtten Im Bad gewesen, haben wir vns beede darin begeben; darInnen Ich mich nitt Allein erlustigett, sundern es Ist mir In meinen glüdern Zum post Reytten auch wol bekhomen. Ehe Anderhalb stund für Iber giengen, kamen Nach vnd Nach In einer halben stund bey Zway vnd Zwaintzig merertayl Altte Weyber In vnser Bad zu baden. Die hatten Ir freindtlich gesprech mitt vns bayden. Inn dem als Ich sahe, daß kein Andere mansperson Woltte Ins bad khomen, fangt mir an bey so vil Weyber zu sitzen bang werden, vnd begab mich samptt meinem geförtten Aus dem bad. Als Ich mich nach meinem schnuptüechlin, mit mir Zunemen, vmbgesehen, hatt selbiges vntter den Weybern eine mir solches gezeigtt, sy wöls seubern vnd hernach Ins gemach hinauff schicken, dan sy vnd Ire mit badweiber seyen der Hoffnung, sy wöllen damit ein Drunckh verdienen. Ehe Ich meine klayder völlig wider angetzogen, khomptt mir daß tüechle Sauber truckhen zue; zur Danckhsagung schickt Ich Innen ein hültzen RätschKantten mit einem trünckh Zapfen, so alda gebreychig, mit vngefer vier Vlmer maß Wein Ins bad; die haben

ein solch frölich Jubeliren vnd gesang darIber gehabtt, dass Meniglich zugeloffen, vmb der Weyber Freud zuerkhundigen, vnd haben mir Alle glückhliche Wolfartt dar Iber Zu wünschen durch die Badwirdtin mit grossem Danckh antzaigen lassen. Als Ich mich woltt wider nach der Statt Baden vnd alda vff die post begeben, haben Zween fürneme burger, darunder einer des Raths, Zu einem Abendtdrunckh mich beruffen. Als ich wöllen darfür bitten, Ich mueß fortt Reytten, Ist mir gerathen worden, nitt Abzuschlagen; man derfftes mir Zu einem groben Vnverstand Anziehen, sundern sols für ein Ehr haltten. Als Ich Zu Innen khomen, habens mich freindlich empfangen vnd Neben Innen vntter ein schönnen braytten grienen Linden gesöztt, haben mir Zway gleßlin, Weytters nitt, Zudrunken. Vntter dössen schücktt ein frantzösische Gräuin Iren Diener, stattlich klaydt, Zu mir, begert zuwissen, wo Ich woltt hinraysen; bald ward mir Zur Anttwortt, Ich soltte mich ein kleins gedulden, sy wölle mir ein schrey ben an gouernator gehn Lion, ein Anders An Cardinal gehn Auignion mitt geben; als solche förttig, begertts, Ich soltts selbs bey Ir holen. Da wurdt Ich In Ir bad hinein gefüertt, die saß Im Wasser Aller bloß biß vff den Nabel, mit einer einfachen gulden köttin vnd Zwayen Armband, behengt; bey Ir warn Zwen Jung herrn, ein frölin, Aller bloß, daß ölttest möchtt von drey Zöhen Jarn geweßt sein; vnd weil sy kain andern als Ir frantzösische sprach kundt Röden, gefüel Ir wol, daß Ich Ir kundt Anttwortten, begertte starckh an mich, soltte In Irn Losamentt mein Nachtleger haltten, daß Nachttmal bey Ir Einnemen. Ich Nam Aber meinen gebürendt Abschid, die Zwen brieff Zu mir, kam vngevähr vmb fünf Vhrn Abendt wider In die Statt baden. Denselben Abendt Ritt Ich noch bey gutter Zeitt postweyß biß gehn Aro, vnd weil groß Reggen wetter Angefallen, mußt Ich verharren des Andern tags vmb Zway Vhrn Nach mittnacht. Den 21 Morgens früe vor tags kam Ich Zu einer Andern post, gehn herchingen, ein Dorff, muß Zwo stund vff pferdtt Wartten. Da Ich vermaint, Woltte bald fortt Reytten, so hatt Aber mein postilon so wol als Ich so schlemes pferdtt, daß Ich ob beeden, ob Ichs wol Zu Reytten abgewexseltt, Zum Vierdtten mal bin mitt Iber vnd Ibergefallen, vnd da der postilon nitt so starckh darfür gebetten, woltt Ich Iedem ein ohr abgeschnitten vnd seinem postmayster wider Zu

Ruckh geschicktt haben, vnd kam erst Nach Neyn Vhrn gehn Sollatturen, ein Statt von den drey Zöhen ortt Inn Schweytz.

Zu Sollatturen, weil daß fest Fronleichnam gewesen, woltte mir der postmayster one erlaubnus des frantzöschen Ambassator, der für seinen könig sich alda auffhüeltt, keine pferdtt geben. Als bemeltter Ambassator aus der kirchen vnd Ich für Ine khomen, wardt sein begeren, soltt mitt Ime daß Mittagmal einnemen, wegen Zwayer schreyben An gouernator gehn Lion vnd auch an Cardinal gehn auignion, so er Zwischen der Zeitt woltte lassen verförttigen. An der taffel mußt Ich mich oben an vff der Lincken seytten Zum Ambassattor setzen; hartt an mir thett ein teuscher Edelmann meins erachttens vom Sächsischen oder pfälzischen hof sitzen, vnd was mich der herr thett fragen, thette der Edelmann daß gespött daraus treyben, mit vermelden, die Krone franckreych seye Jeder Zeitt von schwaben schlechttlich bedientt worden; vnd hatt solcher Vom Adel gutt frantzösisch gerödet; darlber Ich Ime geanttwortt, mir Zweifle nichtt, er werde Auch wissens tragen, wie vff heuttigen tag die Königliche M. In Franckreych den drey Reysstötten Augspurg Nürnnberg vnd Vlm Ettlich Tonnen golds schuldig verbleib: ob dan Ir M. nitt sey damitt gedientt worden, vnd wa Andere Nationes so trew seyen gewesen? darlber der Ambassattor gelachtt vnd mir Rechtt geben mitt vermelden, es seye der schuldenlast auch so groß, das, da ers gehörtt, sich verwundertt, daß Ir M. bey selbigem Teuschen so gutten Creditt gehaptt. Der Ambassattor Aber lüesß sich den Spöttler nitt Irren, sundern erzaigtte mir vil Ehr vnd Freindtschafft, gab seinem Diener einen In beuelch, dem postmayster Anzutzeigen, mich mitt Zway gutten postpferdtt beritten Zumachen, Und Nam Also mein vnderthenigen Abschid vmb Zwölf Vhrn Zu Mittag vnd Ritt In Gottes Namen vff einem kleinen klöpper, so mer gesprungen als die post geloffen, Zu der Ersten post biß gehn Bürn so starkh fortt, das derselb postmayster sich wundert meiner geschwinden Ankunfft; kam Also denselben Abendt noch Andere Vier posten, Als gehn Arberg, Mortten, Petterlingen, vnd noch biẞ vmb Ailf Vhr vor Mittnacht gehn Milde; alda thett Ich ein Wenig Rasten.

Zu Petterlingen hab Ich kundtschafft bekhomen, das zway Weysse die böste post pferdt seyen; Aber der postmayster woltte

mirs vff mein begeren nitt Widerfaren lassen, vnd Als Ich Ine mitt Zwo Gold Cronnen bezahlte, woltte er, die ein werde Zu Ring sein. Als Ich geanttwortt, Ich haltte darfür, solche Cronnen soltte wol so gutt als sein pferdt sein, laufft er Im Zorn seiner stuben zue, Nemptt sein braytten schweytzer Degen In die Hand, fragtt mich, ob er nitt so gutt Als ein Cronnen sey. Ich greyff Nach meinem BirstRhor, vnd warnett Innen, er soltte mir nitt Zu Nahe khomen. Untter dössen laufft sein Nachbaur auch mit seinem Degen an der seytten hangendt, ein kurtze person, vns beeden Zue, Lögtt sich gantz freindtlich Inn die sach vnd thett vns mitt einander vergleichen; darauff Zaltt Ich Zwo Maß Wein, der ward außbindig gutt, vnd demüettigte der postmayster sich so viel, daß er mir die Zway Weysse pferdtt obbemeltt laßt Sattlen, wie Ich dan bey der Nachtt sehr wol darauff beritten gewesen.

Den 24. Morgens früe vmb vier Vhren Nach Mitternacht machtt Ich mich von Milden auff vnd Ritt selbigen vor Mittag volgendte posten, Als Montperwere, Losanna, Alleman, Nüęssi vnd fast bei einer halben stund bis gehn Jenff, Alda Ich meines herrn Sun, so auch Melchior Manlich gehayssen, angetroffen, vnd als Ich mich zu erkennen geben, schrib er ein brieff An sein bruder Anthony Manlich gehn Marsillia vnd Machtt sich In selbiger stund auch förttig, vff der post gehn Augspurg Zu Reytten, mitt vermelden, Ich derffe weytter nitt Eillen, soll Allein die post pferdt noch biß gehn lion Nemen vnd mit denselben Allgemach fortt Reytten; Alda mög Ich fünff In söchs tag Still ligen vnd vff ein gutt pferdt wartten, so vff sein hinderlassenen beuelch von Marsillia mir Zu gefallen teglich soll gehn Lion gesandtt werden. Er gab mir auch ein Recomandation schreyben An vorbemeltten Cardinal gehn Auignion vnd Nam damit ein freindlich Vrlaub von mir; Ich Aber, vmb meine Altte bekanntte In Jenff Zubesuchen, verblib noch vff den Abendt; Nach fünff Vhrn sötzt Ich mich wider vf die post Nach Collonge. Nitt weytt dauon heraussen thett Ich mitt meinem postpferdt ein hartten fall, daß Ich In einer Viertel stund nit mer kundtt Zu Roß sitzen, daß Creytz an meinem Rappir wurde Zusammen gedrucktt, daß Ich die handt nitt mer kundte darein stossen noch daß geföß Rechtt fassen, Also das Ich dieselbe nacht bey der Anderen post Zue Schallon mußte Ibernachtt ligen bleiben.