Odi profanum vulgus, et arceo: Favete linguis; carmina non prius Audita, Musarum sacerdos,
Virginibus puerisque canto.
Regum timendorum in proprios greges, Reges in ipsos imperium est Jovis, Clari Giganteo triumpho,
Cuncta supercilio moventis. Est ut viro vir latius ordinet Arbusta sulcis; hic generosior Descendat in Campum petitor; Moribus hic meliorque famâ Contendat; illi turba clientium Sit major: æquâ lege Necessitas Sortitur insignes et imos;
Omne capax movet urna nomen. Destrictus.ensis cui super impiâ Cervice pendet, non Sicula dapes Dulcem elaborabunt saporein;
Non avium citharæque cantus Somnum reducent: somnus agrestium Lenis virorum non humiles domos Fastidit, umbrosamque ripam, Non Zephyris agitata Tempe. Desiderantem quod satis est, neque Tumultuosum sollicitat mare, Nec sævus Areturi cadentis Impetus, aut orientis Hædi;
Non verberate grandine vineæ, Fundusque mendax; arbore nunc aquas Culpante, nunc torrentia agros Sidera, nunc hiemes iniquas. Contracta pisces æquora sentiunt, Jactis in altum molibus; huc frequens Camenta demittit redemtor
Cum famulis, dominusque terræ Fastidiosus: sed Timor et Mina Scandunt eodem quo dominus; neque Decedit æratâ triremi, et
Post equitem sedet atra Cura.
Quod si dolentem nec Phrygius lapis, Nec purpurarum sidere clarior Delenit usus, nec Falerna
Vitis, Achæmeniumque costum;
Cur invidendis postibus et novo Sublime ritu moliar atrium? Cur valle permutem Sabinâ Divitias operosiores?
Angustam amicè pauperiem pati Robustus acri militiâ puer Condiseat; et Parthos feroces
Vexet eques metuendus hastâ: Vitamque sub divo, et trepidis agat In rebus illum ex manibus hosticis Matrona bellantis tyranni
Prospiciens, et adulta virgo,
Suspiret: Eheu! ne rudis agminum Sponsus lacessat regius asperum Tactu leonem, quem cruenta
Per medias rapit ira cædes.
Dulce et decorum est pro patriâ mori : Mors et fugacem persequitur virum ; Nec parcit imbellis juventæ Poplitibus timidove tergo.
Virtus, repulse nescia sordidæ, Intaminatis fulget, honoribus:
Nec sumit aut ponit secures Arbitrio popularis auræ. Virtus, recludens immeritis mori Cœlum, negatâ tentat iter viâ; Cœtusque vulgares et udam
Spernit humum fugiente pennå. Est et fideli tuta silentio
Merces: vetabo, qui Cereris sacrum Vulgârit arcane, sub isdem
Sit trabibus, fragilemve mecum Solvat phaselon. Sæpe Diespiter Neglectus incesto addidit integrum: Raro antecedentem scelestum Deseruit pede Pœna claudo.
Justum et tenacem propositi virum Non civium ardor prava jubentium, Non vultus instantis tyranni
Mente quatit solidâ, neque Auster
Dux inquieti turbidus Adria,
Nec fulminantis magna Jovis manus : Si fractus illabatur orbis, Impavidum ferient ruinæ.
Hac arte Pollux, et vagus Hercules, Enisus, arces attigit igneas;
Quos inter Augustus recumbens Purpureo bibit ore nectar.
Hac te merentem, Bacche pater, tuæ
Vexêre tigres, indocili jugum Collo trahentes: hac Quirinus Martis equis Acheronta fugit;
Gratum elocutâ consiliantibus Junone Divis: Ilion, Ilion
Fatalis incestusque judex, Et mulier peregrina vertit
In pulverem, ex quo destituit Deos Mercede pactâ Laomedon, mihi Castæque damnatum Minervæ, Cum populo et duce fraudulento.
Jam nec Lacænæ splendet adulteræ Famosus hospes, nec Priami domus Perjura pugnaces Achivos Hectoreis opibus refringit; Nostrisque ductum seditionibus Bellum resedit; protinus et graves Iras, et invisum nepotem,
Troïca quem peperit sacerdos, Marti redonabo. Îllum ego lucidas Inire sedes, ducere nectaris Succos, et adscribi quietis
Ordinibus patiar Deorum.
Dum longus inter sæviat llion Romamque pontus, quâlibet exsules In parte regnanto beati:}
Dum Priami Paridisque busto Insultet armentum, et catulos feræ Celent inultæ, stet Capitolium Fulgens; triumphatisque possit Roma ferox dare jura Medis. Horrenda late nomen in ultimas Extendat oras, quâ medius liquor Secernit Europen ab Afro,
Quâ tumidus rigat arva Nilus;
Aurum irrepertum, et sic melius situm,
Cum terra celat, spernere fortior, Quam cogere humanos in usus, Omne sacrum rapiente dextrâ.
Quicumque mundo terminus obstitit, Hunc tangat armis, visere gestiens Quâ parte debacchentur ignes, Quâ nebulæ pluviique rores. Sed bellicosis fata Quiritibus Hac lege dico, ne, nimium pii, Rebusque fidentes, avitæ
Tecta velint reparare Troja. Troja renascens alite lugubri Fortuna tristi clade iterabitur, Ducente victrices catervas Conjuge me Jovis et sorore.
Ter si resurgat murus aeneus Auctore Phobo, ter pereat meis Excisus Argivis;` ter uxor
Capta virum puerosque ploret. Non hæc jocosæ conveniunt lyræ: Quo, Músa, tendis? desine pervicax Referre sermones Deorum, et Magna modis tenuare parvis.
Descende cœlo, et die age tibiâ Regina longum Calliope melos, Seu voce nunc mavis acutâ,
Seu fidibus, citharâve Phœbi. Auditis? an me ludit amabilis Insania? audire et videor pios Errare per lucos, amœnæ
Quos et aquæ subeunt et auræ. Me fabulosa Vulture in Appulo, Nutricis extra limen Apuliæ, Ludo fatigatumque somno
Fronde novâ puerum palumbes Texêre; mirum quod foret omnibus, Quicumque celsa nidum Acherontiæ, Saltusque Bantinos, et arvum
Pingue tenent humilis Ferenti,
Ut tuto ab atris corpore viperis
Dormirem et ursis; ut premerer sacrâ Lauroque collatâque myrto,
Non sine Dis animosus infans. Vester, Camœnæ, vester in arduos Tollor Sabinos; seu mihi frigidum Præneste, seu Tibur supinum, Seu liquide placuêre Baix. Vestris amicum fontibus et choris, Non me Philippis versa acies retro, Devota non exstinxit arbor,
Nec Sicula Palinurus undâ.
« PoprzedniaDalej » |