PONTIFICALE ECG BERHTI,

ARCHIEPISCOPI EBORACENSIS.

ORDINATIO EPISCOPI.

Episcopus cum ordinatur, duo Episcopi ponant et teneant Evangeliorum librum super cervicem ejus, et unus fundat super eum benedictionem, et postea istas tres orationes omnes Episcopi, qui adsunt, recitare debent; reliqui vero manus suas super caput ejus

teneant.

Oremus, dilectissimi nobis, ut huic viro Ill. ad utilitatem Ecclesiæ provehendo benignitas Omnipotentis Dei gratiæ suæ tribuat largitatem. Per.

Item alia.

Adesto supplicationibus nostris Omnipotens Deus, et quod humilitatis nostræ gerendum est ministerio, tuæ virtutis impleatur affectu. Per.

Alia.

Propitiare, Domine, supplicationibus nostris, et inclinato super hunc famulum tuum Ill. cornu gratiæ sacerdotalis, benedictionis tuæ in eum effunde virtutem. Per.

Alia.

Exaudi, Domine, supplicum preces, ut quod nostro gerendum est ministerio, tua potius virtute firmetur. Per.

B

Iterum unus ex eis dicat hanc orationem super Episcopum.

Deus honorum omnium, Deus omnium dignitatum, que gloriæ tuæ sacris famulantur ordinibus, Deus qui Moysen famulum tuum secreti familiaris affectu, inter cetera cœlestis documenta culturæ, de habitu quoque indumenti sacerdotalis instituens electum Aaron, mistico amictu vestiri inter sacra jussisti, ut intelligentiæ sensum de exemplis priorum caperet secutura posteritas, ne eruditio doctrinæ tuæ ulli deesset ætati, cum et apud veteres reverentiam ipsa significationum species obtineret, et apud nos certiora essent experimenta rerum, quam enigmata figurarum. Illius namque sacerdotii anterioris cultus ad mentis nostræ habitum ornatus est, et pontificalem gloriam non jam nobis honor commendat vestium, sed splendor animarum; quia et illa quæ tunc carnalibus blandiebantur obtutibus, ea potius quæ in ipsis erant intelligenda poscebant. Et idcirco huic famulo tuo Ill., quem ad summi sacerdotii ministerium elegisti, hanc, quæsumus, Domine, gratiam largiaris, ut quicquid illa velamina in fulgore auri, in nitore gemmarum, in multimodi operis varietate signabant, hoc in ejus moribus actibusque clarescat: comple in sacerdote tuo ministerii tui summam, et ornamentis totius glorificationis instructum eum cœlestis unguenti flore sanctifica, hoc, Domine, copiose in ejus capud influat, hoc in oris subjecta decurrat, hoc in totius corporis extrema descendat, ut tui Spiritus virtus et interiora ejus repleat, et exteriora circumtegat: abundet in eo constantia fidei, puritas dilectionis, sinceritas pacis: sint speciosi pedes ejus ad evangelizandum verbum tuum, non in persuadibilibus humane sapientiæ verbis, sed in ostensione spiritus et virtutis. Da ei, Domine, claves regni cœlorum, ut quodcumque ligaverit super terram, sit ligatum et in cœlis, et quodcumque solverit super terram, sit solutum in cœlis, et quorum detinuerit peccata, detenta sint, tu, Domine, dimittere digneris: da ei humilitatem veram, patientiam perfectam, ut non dicat bonum malum, nec malum bonum, nec ponat lucem in tenebras, nec tenebras in lucem tribuas ei cathedram episcopalem ad regendam Ecclesiam tuam, et plebem universam sis ei auctoritas, sis potestas, sis ei firmitas: multiplices super eos (vel eum) benedictionem et gratiam tuam, ut ad exo

randam misericordiam tuam, tuo munere semper idonei (idoneus), tua gratia possint (possit) esse devoti (devotus). Per.

Consecratio manuum Episcopi.

Unguentur manus istæ et santificentur, et in te Deo Deorum ordinentur. Unguo has manus oleo sanctificato, et chrismate unctionis purificato, sicut unxit Moyses verbo oris sui manus sancti Aaron germani sui; et sicut uncxit Spiritus Sanctus per suos flatus manus omnium sacerdotum; et sicut Jesus Salvator omnium nostrorum sanctificat manus suorum Apostolorum. Ita unguentur manus istæ et sanctificentur et consecrentur, ut in omnibus sint perfectæ, in nomine tuo, Pater, Filiique tui, atque æterni Spiritus Sancti, qui es unus ac summus Deus omnium vivorum et mortuorum manens in sæcula sæculorum.

Alia.

Unguentur manus istæ et consecrentur de oleo sanctificato, sicut unxit Samuel David in regem et prophetam. Ita unguentur et consummentur in nomine Dei, Patris et Filii et Spiritus Sancti.

Modo mittendum est oleum in caput ejus.

Unguatur et consecratur caput tuum cœlesti benedictione in ordine pontificali. In nomine Patris et Filii et Spiritus Sancti. Amen.

Pax tibi.

Et cum spiritu tuo.

Cum datur baculus hæc oratio dicitur.

Accipe baculum pastoralis officii, et sis in corrigendis vitiis seviens, in ira judicium sine ira tenens, cum iratus fueris misericordiæ reminiscens.

Cum anulus datur hæc oratio dicitur.

Accipe anulum pontificalis honoris, ut sis fidei integritate

munitus.

Oratio ad pontificem ordinandum, quæ addi debeat in consecratione, cujus initium est.

Deus honorum omnium, Deus omnium dignitatum, que gloriæ tuæ sacris famulantur ordinibus: Deus qui Moysen famulum tuum, et cetera usque quo ait, et idcirco huic famulo tuo Ill., quem apostolicæ sedis præsulem et primatem omnium qui in orbe terrarum sunt sacerdotum, ac universalis Ecclesiæ tuæ doctorem dedisti, et ad summi sacerdotii ministerium elegisti; hanc, quæsumus Domine, gratiam largiaris, tribuas cathedram pontificalem ad regendam Ecclesiam tuam et plebem universam. Per.

Modo mittendus est in cathedram episcopalem, et hæc oratio dicenda est.

Omnipotens Pater, Sancte Deus æterne, tu omnem ordinem dignatus es in cœlestibus sedibus ordinare, ut ait Psalmista: Domine, in æternum permanet verbum tuum. Tu in cœlo angelos et archangelos suo tibi ordine mancipari, et in veteris testamenti privilegio Moysen et Aaron et Samuhel, inter eos in sacerdotibus tuis qui invocant nomen tuum, patriarchas et prophetas, perungi ordinasti, in novo per Filium tuum Jesum Christum apostolos sanctos ex sanctis omnibus elegisti, primum Petrum apostolum in cathedra honoris, et Mathian ejusdem consortem in apostolatum atque cathedram honoris enumerasti, et in numero sanctorum omnium apostolorum evocasti, et ut Spiritus Sanctus ait per prophetam in cathedra seniorum laudent Dominum: divino nutu æque de aliis hæc adque aliis contigerunt. Et nunc, Domine, pro tua immensa misericordia in nostris temporibus, da similem gratiam fratri nostro Ill., ad instar sanctorum apostolorum tuorum sedentium in cathedra honoris et dignitatis, ut in conspectu majestatis tuæ dignus honore appareat. Per eundem.

Domine Jesu Christe, tu præelegisti apostolos tuos, ut doctrina sua nobis præessent, ita etiam vice apostolorum hunc episcopum doctrinam docere, et benedicere, et erudire digneris, ut inmaculatam vitam et inlesam conservet. Per omnia.

BENEDICTIO EJUSDEM SACERDOTIS.

Populus te honoret, adjuvet te Dominus, quicquid petieris prestet tibi Dominus cum honore, cum castitate, cum scientia, cum largitate, cum caritate, cum nobilitate. Dignus sis, justus sis, humilis sis, sincerus sis, urbanus sis, apostolus sis. Accipe benedictionem et apostolatum qui permaneat in die isto, et in die futuro, angeli sint ad dexteram tuam, apostoli coronati ad sinistram, Æcclesia sit mater tua et altare. Sit Deus pater tuus, sint angeli amici tui, sint apostoli fratres tui, et apostolatus tui gradum custodiant. Confirmet te Deus in justitia, in sanctitate. In Ecclesia sancta angeli recipiant te. Et pax tecum indiscrepabilis per redemptorem Dominum nostrum Jesum Christum, qui cum Patre et Spiritu Sancto vivit et regnat in sæcula sæculorum. Amen.

Alia benedictio in consummatione episcopi.

Spiritus Sanctus septiformis veniat super te, et virtus Altissimi sine peccato custodiat te, et omnis benedictio, quæ in scripturis sanctis scripta est, super te veniat. Confirmet te Deus, Pater et Filius et Spiritus Sanctus, ut habeas vitam æternam, et vivas in sæcula sæculorum. Amen.

Super oblata.

Hæc hostia, Domine quæsumus, emundet nostra delicta, et sacrificium celebrandum subditorum tibi corpora mentesque sanctificet. Per.

Alia super oblata.

Suscipe, Domine quæsumus, munera quæ

tibi offerimus pro

famulo tuo Ill., et propitius in eodem tua dona custodi. Per.

In fractione.

Hanc igitur oblationem servitutis nostræ, set et cunctæ familiæ tuæ, quam tibi offerimus, etiam pro famulo tuo Ill. quem ad episcopatus ordinem promovere dignatus es. Quæsumus, Domine, ut placatus accipias, et propitius in eo tua dona custodias, ut quod